BUKOBA KUFUKIA MALENGO YA MILENIA KABLA YA 2015

Shamba la migomba ambalo limeathiriwa na ugonjwa unyanjano kupita mradi wa MAF shamba hili likitumika kwa mazao mengine inaweza kusadia kufikiwa kwa malengo ya milenia.

Na Livinus Feruzi

Bukoba

IKIWA imebaki takribani miaka mitatu kabla ya kuhitimisha mpango wa malengo ya Milenia 2015, halmashauri ya wilaya ya Bukoba imezindua mradi wa kuharakisha kufikiwa kwa malengo hayo kupitia sekta ya kilimo.

Mradi huo wa MAF unaotekelezwa kwa kushirikiana asasi za kiraia mkoa wa Kagera ulizinduliwa jana na mkuu wa wilaya ya Bukoba Bi. Zipporah Pangani na unalenga kuharakisha kufikiwa kwa lengo la milenia namba moja la kupunguza umaskini wa kipato na njaa.

Akizungumza wakati wa uzinduzi huo Bi. Pangani alisema ili mradi huo uweze kufanikiwa inahitaji wananchi kujituma na viongozi kuwajibika kwa hali ya juu na kutaka fursa hiyo itumike kuleta mabadiliko.

Alisema kutokana na hali ya hewa kuwa nzuri katika wilaya hiyo, hakuna sababu ya wananchi kushindwa kujitosheleza kwa chakula na kuwa wakulima wakipatiwa pembejeo za kilimo inawezekana halmashauri hiyo kufikia malengo ya milenia.

“Tunataka mabadiliko baada ya mradi huu ni lazima maisha ya wananchi yabadilike, sioni sababu ya wilaya ya Bukoba yenye hali nzuri ya hewa kushindwa kuzalisha chakula zaidi” alisema Bi. Pangani.

Mkuu huyo wa wilaya alitaka makundi maalum katika mradi huo kupewa kipaumbele kwa kuhakikisha wanaanzisha vikundi vya wakulima wa zao la alizeti na kuahidi serikali kutoa ushirikiano ili kufanikisha mradi huo.

Awali Mratibu wa mradi huo wa MAF kupitia asasi za kiraia mkoa wa Kagera Bw. Joas Kaijage alisema unalenga kupunguza njaa na umasikini wa kipato na kuwapatia wananchi taarifa za masoko, fursa za mikopo na mitaji

Aidha unalenga kuwapatia wakulima taarifa sahihi za teknologia mbalimbali za kuboresha kilimo na kuongeza uzalishaji wa mazao.

Kwa upande wake mratibu wa MAF halmashauri ya wilaya ya Bukoba Bw. Ngabo Pamba mradi umejikita katika kuanzisha mazao ya alizeti, mihogo na mpunga wa nchi kavu ili yawe mbadala kwa mazao makuu ya kahawa na migomba.

Nyingine ni kuendeleza ufugaji wa kuku wa kienyeji na ufugaji wa samaki wa kienyeji.

Mradi huo wa majaribio kwa miezi mitano unafadhiliwa na shirika la maendeleo la umoja wa mataifa (UNDP) na unatekelezwa kwa ushirikiano kati ya halmashauri ya wilaya ya Bukoba na mtandao wa asai zisizo za kiserikali mkoa wa Kagera (KANGONET).

mwisho